Hərb tariximiz- qürur mənbəyimiz!

Azərbaycan Xalq Cümhuriyyətinin yaranmasının 105 illiyi ilə əlaqədar məktəbimizin Hərbi rəhbəri və Təşkilati işləri üzrə direktor müavininin 2023 –cü il fərdi tədbirlər planına əsasən bir qrup müəllimlərimiz haqq yolunda, vətən uğrunda əziz canını qurban verən şəhidlərimizi ziyarət etmək qərarına gəldik. Bu müqəddəs səfərə şəhidlərimizin uyuduğu xiyabandan başladıq. Ziyarət zamanı həm itkilərimizə kədərləndik , həm də sayələrində 30 ilin həsrətinə qovuşduğumuz üçün qürur və fəxarət hissi keçirdik.

Azərbaycana sonsuz var-dövlət, yeraltı və yerüstü sərvətlər bəxş edən uca Tanrı, həm də naxələf və nankor qonşu da vermişdi. Bu qonşuların nə zamansa öz xislətlərini göstərəcəklərini hamıdan aydın görməyi bacaran Ulu Öndər hələ sovetlər dönəmində Azərbaycanda ordu quruculuğunun əsasını qoymağa müvəffəq olmuşdu. Xalqımızın hərb tarixində kədərli anlarla bərabər qürurlu, şanlı-şöhrətli anlar da çoxdu. Bu anların əyani sübutalrını isə Azərbaycanın Hərb Tarixi Muzeyində görmək olar. Bu məqsədlə məktəbimizin hərbi rəhbəri , ehtiyyatda olan polkovnik-leytenant Muraz Sadıqovun zəhməti və nüfuzu ilə bu muzeyi ziyarət etmək bizə də qismət oldu.

Muzeyin rəhbər və bələdçi heyyəti bizi istiqanlı qarşılayıb muzeyin həyətində yerləşdirilən ağır texnikalarla, tanklarla, toplarla və helikopterlərlə tanış edəndən sonra içəri dəvət etdi. Peşəkar bələdçilər Şəlalə Behbudova və Səbinə Əhmədova muzey haqqında ətraflı məlumatlar verdi. Məlum oldu ki, bu gün artıq 12 zaldan və 12000 eksponatdan ibarət olan bu muzey hələ 1992-ci ildə Sovet Qoşumlarının Döyüş Şöhrəti Muzeyinin bazasında fəaliyyət göstərib. Burada "Hərbi Hava Qüvvələri”, "Quru Qoşunları”,” Hərbi Dəniz Qüvvələri”,”Heydər Əliyev və ordu quruculuğu”,”Müasir dövr”,”Zəfər tarixi ”,”Xocalı faciəsi ”,”Şuşa qalası” və .s. zallar fəaliyyət göstərir. Azərbaycan ordusunun Xürrəmilər, Səlcuqlar, Səfəvilər, Xanlıqlar, Çar Rusiyası, Birinci və İkinci Dünya müharibəsi dönəmində istifadə etdiyi hərbi sursat, döyüş sursatları, geyimlər, döyüş bayraqları, ilk Sovet İttifaqı Qəhrəmanlarından İsrafil Məmmədov və Həzi Aslanovun fotoları, Dünya xəritəsinin əllə hazırlanmış 3D formatı, son vətən şəhidlərimizin ailə üzvləri tərəfindən təqdim edilən şəxsi əşyalar, hərbi sursatlar burada böyük qayğı və həssaslıqla qorunub saxlanılır. Burda əvvəllər kənd təsərrüfatında istifadə olunan və 44 günlük savaşda ermənilərin döyüş məqsədi ilə istifadə etdiyi dronların saxlanılması həm də gələcək nəslə bir messajdı.

Gözlərimizdə həm tarixi itkilərdən doğan kədər , həm də qürur və fəxarət yaşları ilə muzeydən aralanıb bu tarixlərin son şanlı səhifəsi və son nidası olan Hərbi Qənimətlər Parkına yollandıq. Burda həm ordumuzun və Ali Baş Komandanın uğurlu komandanlığı ilə aparılan döyüş taktikasının , həm də düşmənin məkrli siyasətinin canlı izləri olan qənimətlər hər kəsi riqqətə gətirdi.

Ziyarətimiz 4 saat çəkdi. Amma biz sanki bir əsr yaşadıq, vuruşduq, döyüşdük, incidik, qan tökdük, qalib olduq və taleyin sınağından üzü ağ çıxdıq.

Şəhidlərimizə rəhmət, qazilərimizə can sağlığl, müzəffər ordumuza ruh yüksəkliyi və Ali Baş Komandana can sağlığı və yeni zirvələr fəth etmək arzulayırıq!

Adil Həmid.

Şair- publisist, AJB-in üzvü.” Qızıl Qələm Mükafatı” laureat.